حتي لما بيرعشك البرد
ويشتد عليك
والضـلمة بتخرمسْ حواليك
لا بتطمع تدخل بيتهم
ولا حتي تخطي عتبتهم
ليه بيرشوا في طريقك
شوك حواديتهم
وبيحاصروك هلافيتهم
كارهينك ليه
مع انك يا ما غنـّيتهم
وداديت أطفالهم
وانت صغيـّر
وقصايد شعرك كانت بلسم
بيداوي حيرتهم
ليه يارب خلقت الجاهل
ما بيفهمش ان الدنيا بتتغيـّر
وان الانسان
كل اما بيكبر سنـّه
عقله بيكبر
لكن نفسه بيقصر
ركبه بتخشـّن
خطاويه تتعتر
لكنه يقدر يختار ويميز أكتر
بين اللي بيفت له لقمته
في الطبق المتكسر
واللي بيغرف له من قعر الأنجر
و بيقدر يفهم ويفسـّر
ما بين المتخفي خوف يتستر
وما بين المتداري غباوة
لكن ساعة العوزة بيظهر
ويفرق ما بين اللي ذنبه الأغبر
بيخلي لسانه يمرر
وسليم النـية الطيب
اللي غصب عنه
بيخلط سمه في السكر
ويقدّر .. ليه كل ما يكبر
يقلق أكتر
يتحير يتكدر
ولا يقدرش يفسر
ليه الدون والعرّة بيغيروا منه
وليه السوّ بيحكوا غل وكدباً عنه؟
و ح يموت و لا يعرف
إنه لأنه ببساطة
مع إنه كبر سنـّه
وخرّف بقلاطة
ما كدبش علي روحه
وما خانش . . ولا في السر
ضميره وفنه