و أنت المعطّر بالعسل والتوت
كان فين تهم
بتنتشي وتفوت
كاسر حدود السكوت
شمروخك النبوت
يلاغي الطير
يشم طين البراري
خد تفاحة
يستطعم النعمة
في عرق الفقير
ولا يستجير
غير من آهات الغير
فرحان بنفسه
وجاي علي نفسك
كنّـــك مكتف
في معايب أمسك
تخونك العشرة
وماء النيل
وصمت الحزن
لما فرهدتنا الخيل
تخونك الحنية في المواويل
الليل ما عدش رحيم
ولا النهار طيب
الموت علي مهله
كإنه قريب
ينط قلبك
زي طفل غشيم
يقرفصك علي رصيف الوطن
تبيع قصايدك
سحت بالمليم
تمن الرغيف
وحق عشق قديم
ناكر صداه الصوت
فاكر مداه العطش
حاكم عليك
جوع اليتيم بالهوي
مرة القصايد
و ما عادش فيها الدوا
بتمزعك ما بين وبين
بنابين
عشم الأبالسة
في النعيم الجنة
ولهفة العاشق
لحضن جحيـــــــم
مساحة صغيرة للألم

ليه كل اما بيكبر سـّنك؟
الدون والعـرة بيغيروا..منك
والسـّو بيحكوا
غلّ وكدبا ً عنك
كنـّك خاطف لقمتهم
رزقتهم
أو قاطع سكـّتهم
مع إنك كل اللي بتعمله
علي قدك
يا دوب كـّل صباح
بتفتح وردك
تكتب لجل تدفيّ بشمس الحرّية
زواريق أرضك
ما بتقدرشي
ع اللي بيخرج عن يدّك