قال لك إيه
كان إيه جري لنا يا صحاب الخير
النيل تلوث وسلم مركبه للغير
وانبح صوت الطير وصابه البلا
صابه اللي ما قدرشي عليه بالمرض
لما خلط حلمه بدنئ الغرض
بالجهل والكدب كرّه عزته في رضاه
نفق بأنفلوانزا مستورده
اتعودوا المؤمنين الزعيق في الصلاه
والكل أصبح يغني علني علي ليلاه
يبوس ايدين مولاه ويتف علي دقنه
كله بياكل لحم أمه وابوه
دايس في بطن أخوه
أعمي البصيره متلهي ف شأنه
القرش أصبح ضمير
وابن الأنيتة أمير
والكره صار الشريعة والغضب قوانين
استفحل الأجنبي
واستقوي عبد المعين بينوع التفانين
صبح الدولار النبي
والمفتي صلي عليه
وصاحب العيبة استوي ع العرش بالدستور
آمر وهو ف حقيقته عبد للمأمور
وحده لوحده
اللي يعلم خافيَ المستور
لا موسي حتي ولا محمد
ولا عبسي
كل السنين أصبحت مسحورة وكبيسة
كل الأمم زي الذمم مكسورة
كل الغيطان مهجورة
كافة جوامع كنايس معابد المعمورة مأجورة
كل البطون الحوامل بالأمل مبقورة
والكل رايح لأجله
بكل قيافة وحماسة
فاكرها لعبة سياسة
وأنا كان في نفسي
أحبك قد أمي و أختي
وأسكنك جوه قلبي حلم
كنك بختي
نطير سوا وكأننا زغاليل
أول ما شفتي النيل ذليل صرختي

موسي نبي
عيسي نبي
محمد نبي
ليه كل من له نبي
ليه اتلهي وناسيه
ولا حد فاكر نبيه
لجلن يصلي عليه غرق العجوز الفهلوي ف دمه

وخرس معاه الكلام الشعرا والأنبيا
قطعوا لسانه
بسيف مسنون حجر صوان
مصهور علي جمر تجار كافة الأديان
وحزن فلاحة ..وموت أراجوز